Liebi PUR-JAM Fründe,
Ganzi 9 Jahr isch es här sit d’PUR-JAM im 2006 z’letscht Mal im Restaurant Kreuz Allmendingen / Dörfli Bar hei gschpilt. Am letschte Samschtig am „Chlouserock“ hei mir das Chrüz wider eis dörfe rocke – u das het eifach nume gfäderet u gmotoret. Mir bedanke üs bi Claudia u Tom Moser u em Chrüz Team für ds Engagement u Di super Betreuuig.
Das üs üse Bläsersatz-Schriber Rolf Häsler us Interlake als Special Guest chunnt cho understütze isch e bsungeri Ehr gsi u het no einisch meh Bode gleit. Ke Wunder, isch är doch eine vo de beschte Schwizer Sax-Crack’s u dr ehemalig Mentor vo üsem Bruno Kyburz.
Aber z’Wichtigschte amene Gig sit Dir alli – üses Publikum wo mitgschwoofet, gsunge u mit üs e Bandparty gfiiret het. So geil – da het kene meh chönne ruhig blibe. Mir nid u Dir nid. Mir hoffe es het allne gfalle u mir chäme gärn ume eis i ds Chrüz cho powerä!
Jitz hei mir grad e 3 wüchigi Gigpouse u für die wünsche mir Euch allne schöni Wiehnachtstäg u hoffe Dir chönnets so richtig gniesse. A propos gniesse…..Mir heis o gnosse, das 2015 mit u vor allem wäge Euch.
De wei mer doch de das alte Jahr zäme no einisch e so richtig la usrocke…..aber wo?
Wo: Grossi Silvester Party im Ratsstübli z’Thun bi Reto Bürki u sinere Crew
Wen: Donschtig 31. Dezember 2015
Zyt: Türöffnig ab 20 Uhr mit Musig vom DJ u ab 22 Uhr mit „PUR – JAM“ live
Tickets chöit dr im Ratsstübli a dr Bar ga choufe. Für Fr. 35.- isch e Salat vom Buffet u ne Bratwurscht inklusive Mitternachtscüpli inbegriffe. A dr Aabekasse choschtets de Fr. 40.-. Aber Achtung! Es chönnt de bis denn scho usverchouft sii. Also nüt wi ab i ds Stübli ga es Ticket hole.
U de fröie mir üs mit Euch chönne Silvester z’fiire mit Rock Blues u Funk.
See you
PUR – JAM / dl
